GSME ka filluar fushaten QESHU. Nje fushate që ka për qëllim përmirësimin e marrëdhënieve profesor – student në Fakultetin e Mjekësisë në Universitetin e Prishtinës.

Duke ditur rëndësinë e madhe që ka Fakulteti i Mjekësisë në krijimin e kuadrove të reja, dhe duke qenë se ky institucion është bazamenti i Shëndetësisë në Kosovë, është shumë e nevojshme që kushtet dhe kualiteti i studimeve të jenë në nivelin e duhur. Një nga standardet kryesore për një ambient të mirë dhe modern të studimeve është edhe krijimi i një komunikimi të mirë në mes profesorëve dhe studentëve.

Në situatën aktuale që është trashëguar, në një masë të konsiderueshme ekziston mentaliteti sipas të cilit në qendër të vëmendjës së studimeve është profesori dhe jo studenti ku:

- Mënyra dhe forma e evaluimit është e drejtë eksluzive personale e mësimdhënësit dhe nuk është e standartizuar.
- Nuk ekziston organ për monitorimin e respektimit të etikës profesionale në procesin e mësimdhënies.
- Nuk ekziston organ që mbikqyr respektimin e të drejtave të studentëve.
- Nganjehere metodat e komunikimit bazohen në trembjën e studentit për rrëzim nga provimi, humbje nënshkrimi, humbje të vitit dhe prolongim të diplomimit.

Kjo qon në një situatë ku studenti përveq stresit nga provimet i nënshtrohet edhe presioneve tjera të panevojshme dhe jo etike, duke bërë kështu që studimet edhe ashtu të gjata të bëhen një përvojë e hidhur e jetës. Kjo dëmton direkt aftësinë dhe motivimin e studentëve për të mësuar dhe përgatitur për profesionin e tyre.

Kjo fushatë përmes bashkëpunimit me studentët, mësimdhënësit dhe menaxhmentin e Fakultetit synon të sjellë një frymë të re në Fakultetin e Mjekësisë ku përmes veprimeve simbolike të studentëve do të rritet vetëdijësimi i mësimdhënësve për ndikimin që ata kanë në jeten dhe të ardhmen e studentëve.

Përmes kësaj fushate synohet të kalohet në një situatë ku në qendër të vëmendjës është studenti i cili ndihet komod dhe i vlerësuar gjatë studimeve, ku ekzistojnë kushtet që garantojnë lirinë e të shprehurit, ku frika të mos jetë faktori kyq gjatë studimeve dhe ku motivimi për mësim është pozitiv dhe i shëndoshë.

Kjo do të mundësonte zhvillimin e studimeve në një ambient të përshtatshëm për studentët, në mënyrë që periudha 5 ose 6 vjeqare e kaluar në Fakultetin e Mjekësisë të shëndrrohet në një përvojë të mirë jetësore.

GSME - Grupi për Studime Mjekësore dhe Ekologjike